تفرح قلوبنا الطيبه// بقلم عبد الواحد محمد
بعد التعب بعد الشقى
محتاج لحبة فرفشه
حبة دلع حبة فرح
او كلمه حلوه كويسه
م الفجر داير يا حجر
تطحن عظام الشقيانين
فلاح ف غيط عامل بسيط
خبر ف جرنال المسا
فيه حد مات ولا انجرح
ولا انطحن ف المعركه
حرب الرغيف من غير سلاح
ضحاياها خلق طيبه
ضحاياها هما الغلبانين
والدنيا اكبر مدرسة
نبنى العماير الف دور
وننام على جسر الطريق
ومن العرق تدوب هدوم
عرايه حتى من الرفيق
لا نبتسم ولا يوم يجينا فيه فرح
بس القناعة كنزنا
رأس مالنا ف البحر الغريق
كل المنى يادوب رغيف
وجنبه بصله يكون هنا
افرح يا قلب وابتسم
لو لحظه بتجيك ف السنه
ونقول سوى حبه فرح
تروى العطش
تفرح قلوبنا الطيبه
................... ...
عبدالواحد محمد
تفرح قلوبنا الطيبه
تعليقات
إرسال تعليق